蘇志威出山作歌 阿智贈興：磨利刀

不經不覺，今年是草蜢出道31周年，三子透露有新搞作，三月將推出全新國語專輯，連久未寫歌的蘇志威也再次參與作曲。

草蜢、杜德偉（Alex）及鄭欣宜前晚演出新城音樂會，草蜢表示已計劃三月推出國語碟，當中更收錄了三人的創作，蔡一智笑言：「今次請到好耐冇寫歌嘅蘇志威出山，為我哋出道31周年作歌。其實講咗好耐，已send咗去美國做混音，經理人林珊珊話猴年好啲，（過年後）會集中火力宣傳新歌。」

問蘇志威再寫歌會否感到壓力？蔡一智聞言即笑謂：「生鏽嘅刀磨利咗，『降』住我哋！」2月6日生日的蔡一傑則透露，農曆新年約了一位國際級愛人麥當娜，他興奮表示：「會跟住佢去tour，係最好嘅生日禮物。」

Alex怕講造人大計

杜德偉以勁歌熱舞為音樂會揭開序幕，當他唱到《脫掉》時把外套脫掉，但未有露肌肉。問Alex是否天氣凍不敢騷肌？他笑言如果大家想睇多啲，就要等個人演唱會。至於他在台上取笑老婆是米芝蓮，是否暗示太太有孕？Alex緊張解釋只是老婆穿了羽絨，看起來似米芝蓮而已，並重申未有好消息，一切順其自然。

撰文：Pauline

編輯：陳禮恒

設計：鄧俊明