李家鼎《阿爺廚房》顯功架 視迷：用心煮 ‧ 真食神

李家鼎（鼎爺）與譚玉瑛主持的飲食節目《阿爺廚房》於本周一首播，原本以為節目要惡形惡相的鼎爺化身伙頭大將軍必定難吸客，豈料節目播出後卻大受歡迎，網友熱捧鼎爺表現慈祥，顛覆固有形象，更激讚其刀功一流唔花巧，使出真功夫是堅‧大師傅！

無綫一向製作不少飲食節目，包括肥媽、六號的《食平D》系列、黃淑儀的《吾湯吾水》及陳煒的《煒哥的味道》等，近日卻找來擅演大奸大惡角色的資深演員李家鼎，配搭兒童節目主持人譚玉瑛兩位風馬牛不相及的藝人，主持全新飲食節目《阿爺廚房》，教觀眾DIY懷舊粵菜。

原先各界估計節目必定沉悶欠話題，高喊無綫搵個「功夫佬」入廚勁騎呢。不過，節目於周一首播後，觀眾對鼎爺炮製的鬼馬牛肉、古法枝竹羊腩煲、糖煎紅衫魚及「九星拱照」白切雞等，都大讚是平靚正的家常小菜。他又教大家到街巿揀「冧肉」及紅衫魚，技巧及實用性兼備。不少網友對鼎爺刮目相看，激讚這位大師傅有功架，介紹的菜式夠實際；喜見鼎爺原來「有料到」，KO肥媽、陳煒等女主持。

讚拍檔譚玉瑛有火花

本報昨日聯絡到鼎爺，提到不少觀眾讚揚《阿爺廚房》可觀性完勝肥媽、黃淑儀甚至煒哥的飲食節目，他認真道：「千祈唔好咁講，煮嘢各師各法不能比較，大家唔同風格，就算我煮足100分，都會有個101分叻過你，正所謂天外有天、人外有人！」

至於與譚玉瑛拍檔是否比美女花瓶更有火花，鼎爺說：「阿譚多多少少識煮嘢，有得溝通。如果遇到一個蔥同蒜頭都唔識分嘅，我就死畀你睇！所以今次好幸運，大家有問有答，如果有問冇答不如唔好講！」據知今次《阿爺廚房》跨年播足四星期至下月6日，至於前晚第三集收視則錄得17點，可算是有收視又贏口碑。

撰文：Steven、Pat

採訪：Ivy

編輯：黃寶恩

插圖：何樂

設計：Simon