是非心理學

「是與非如何分對錯，恨與哀誰人解因果，敵友之間紛爭，難為彼我，恨愛可有界綫，同是分不清楚……」（摘錄自羅文《強人》歌詞）

有人嘅地方就會有是非，說話做事，處處彰顯因與果，討好同憎惡相輔相成，所以是非二字好多時候係禍端嘅代名詞，用嚟抱怨、嫉妒、攻擊、誣陷，多少悲歡離合、爭鬥訴訟、家破人亡、妻離子散，都係源於一句看似「不經意」嘅是非話，因此霑叔真係好嘢，喺幾句歌詞中表露無遺。

自古聖賢就講過，寧可得罪君子莫得罪小人。你身邊有無一個時刻用搬弄是非嚟同人打交道嘅人？就算你只係聽佢講，喺話題入面搭一句嘴，結果之後呢個是非就變成由你散播出去，令自己陷入險境之中？呢啲死貓，你食過未？

我咁問得，梗係食過好多次啦。遇過都無學精？何解？因為聽人講是非都幾過癮，因為通常「是非精」講是非嘅時候，都會講到繪聲繪影，生動活潑。只要你喺聽是非當中有反應，咁就弊傢伙！因為今次你喺度聽緊人哋做主角嘅是非，下次個主角可能就會變成你！

其實點解要講是非呢？正面原因︰人類講是非係一種社交控制嘅目的。負面原因︰可能源於人嘅自誇心理機制，藉此去比較，喺講是非過程中令自己優越過人。

是非對話中，最常見嘅一句係︰「有人話我知」，或者係「我聽人講」，呢啲人唔願意講出真相，又或者只係講出部分事實，講是非嘅人喺背後就控制住談話內容。「有人話我知」呢句說話，已經引起人嘅好奇心。此外，一齊講人壞話會提高彼此嘅凝聚力，並且有安定自身地位及心情嘅效果。講是非係傳染病，只要一開始講，其他人就好大可能會傳出去。

所以希望日後我可以醒啲，就算靜坐不會思己過，都能夠做到閒談莫論人非。

（本欄逢周四刊登）