自製意大利檸檬甜酒

上周友人帶意大利朋友嚟我屋企食飯。佢見到我酒杯櫃內有兩樽黃色酒，問︰「You also like Limoncello?」「蓮霧車露？」我答。原來我屋企有兩樽好味嘅意大利酒而不自知，真係發現新大陸！

Limoncello係一種檸檬風味嘅甜酒，產自意大利南部那不勒斯灣區等省份。檸檬酒用檸檬皮、酒精、水與蔗糖製成，一種常見餐後酒，被評為意大利人第二喜愛嘅酒。近年來佢喺唔少地方流行，但竟然我喺香港未見過，原來放咗喺我屋企，哈哈。

意大利人自己喺屋企做呢隻酒，真係好容易整︰

先將檸檬清洗乾淨，擦乾淨皮上髒污，再用紙巾擦乾後平放稍風乾。用刀削下黃色部分嘅檸檬外皮。注意，盡量避免白色果髓部分，佢會令成品變苦。可以等全部削完後再用刀剔除果髓。

將酒精（可用伏特加，基本上意大利人會用95%酒精嘅酒），再加檸檬果皮放入乾淨玻璃容器中，密封後放陰暗乾燥處，等兩星期至一個月，畀酒精吸收檸檬果皮嘅油脂同香味。建議隔3、5日𥄫一𥄫，檸檬果皮顏色應漸漸轉淡，酒色漸漸變黃色。

7日至一個月後，將砂糖加水煮滾，待砂糖全部融化即可熄火。將放涼後的糖水倒進檸檬果皮酒中拌勻，然後用濾網隔掉檸檬皮就係檸檬甜酒，再倒入乾淨玻璃容器中保存便成。

裝瓶後甜酒會繼續熟成，等一個月後，會發現甜酒嘅顏色變成更深嘅黃色，呢個時候口感會更好！

你可以直接飲，食雪糕又可以淋啲，做蛋糕又可以落啲，飲咖啡又可以加啲，令平凡變得不平凡，呢個蓮霧車露用嚟送禮自奉都正！

（本欄逢周四刊登）