經典神劇 《請回答1988》

好多時，同一本書、同一套電影，隔一段時間再睇，領會都唔一樣。我喺2016年睇嘅韓劇《請回答1988》，講述1988年住首爾市道峰區雙門洞5個家庭嘅故事，描述溫暖嘅親情、鄰里街坊小市民嘅故事、傳統嘅愛情同友情，勾起觀眾好多共鳴。當時睇得我好開心，每集都令我又喊又笑。我最着眼睇呢班年輕演員嘅愛情同友情方面，當時更開始喜歡朴寶劍這位新韓星，覺得佢好可愛。

近排再睇，簡直覺得呢套係一套神劇。除咗依然每集都令我又喊又笑，任何一個角色都既生動又立體，劇中每個人物同故事，無論哀傷與喜悅都好似有自己嘅影子，一路睇住佢哋嘅故事，就好似回放自己嘅成長片段，觸動內心，令我睇得更投入，感同身受。而佢哋每集都會有一啲好有意思嘅對白，作者嘅寫作水平令我拜服，亦令我反省。讀一部或者睇一部別人人生嘅故事，會有一種看透生活嘅覺悟，但不過只有一刻而已，事實上仍然活得不明不白。

藉住睇呢套戲，帶領我回到童年時期、學生時代、錯過咗父母嘅生活，仲有一啲鄰里關係。如此平淡卻稍不平凡的生活，瑣碎中透露着人性，因為各自擁有不同的色彩，但大家都走過這般過程，都擁有屬於自己嘅18歲美麗青春回憶。我就喺1988年參選香港小姐，嗰年亦係我人生好值得回憶同回味嘅一年，從一個未見過世面嘅少女，一步步走進成人世界。

另一個令我回味無窮嘅原因，就係每一集都會有80至90年代我哋耳熟能詳嘅經典歌曲襯托，點到你唔跌入呢個回憶隧道呢？

總之，如果你同我咁上下年紀，或覺得生活同心情都灰灰地，我強烈舉埋腳，推薦你睇呢套可以令你心花怒放嘅神劇《請回答1988》！

（本欄逢周四刊登）