新手媽媽揀奶樽

「咦，呢隻奶樽咁平嘅？」shopping時見到平嘢，總不自覺望多兩眼。不過Candy一見到我手上嘅奶樽就耍手檸頭︰「呢隻PP膠造㗎，要買就買好啲。」

細心睇先至留意到，大部分膠奶樽嘅包裝都標示住「PP」、「PPSU」及「PES」等字眼，我問Candy︰「呢啲字係咩意思？」

佢解釋︰「係指製造奶樽所用嘅物料。其實膠都有分好多種㗎！」原來買隻奶樽都咁講究。

家長對於奶樽製造物料嘅關注，可由10年前講起。2007年美國環保組織發現，當時坊間嘅暢銷奶樽多以「PC」膠製成，加熱時會釋放雙酚A（簡稱BPA），由於研究指食用微量BPA已經可能影響荷爾蒙分泌及生殖系統，事件令人心惶惶；翌年，加拿大更立例禁止出售會釋放BPA嘅奶樽。家長為免子女出事，紛紛轉投更具質素嘅產品。

現時市面嘅膠奶樽多以PP、PES或PPSU物料製成，包裝均標榜不含BPA（但間中有漏網之魚，如去年CHU CHU奶樽亦捲入同類事件，需不時留意新聞）。

撇除BPA嘅考量，呢三種物料仲有咩分別？先講PP膠奶樽，佢係三者中透光度及耐熱度最低嘅一種，顏色呈乳白色，耐熱度只有120度，高溫消毒容易變形。

至於PES及PPSU膠，則可承受180度嘅高溫，部分親子網站指PPSU膠比PES膠更耐刮，無咁易刮花、黐住污糟嘢。不過同其他媽咪傾開，大家都覺得差異唔算好大。

一般奶樽壽命只有6個月，夠期就要更換。此外坊間亦有壽命長達數年嘅矽膠奶樽，耐熱度更高達400度，不過質地較易黏塵，大家可按需要選購。

（本欄逢周一刊登）