產前講座贈品吸引過內容？

「先排聽個免費講座，有三角枕同幾包奶粉送，真開心！」「唓，啲禮物一般啫，我上次聽嗰個有胎心機送！之前仲收過成罐奶粉，唔似得你呢間咁孤寒送試用裝囉。」

認識幾位媽媽，大肚後每個月都好神心參加各大奶粉商嘅講座。起初大家對湊B咩概念都無，本住求學精神聽下專家講解，但坊間講座來來去去得幾個題目，不外乎產前產後護理、初生嬰兒照料，聽幾次內容開始重複，再去有咩為？明顯醉翁之意不在酒，有咩贈品派先係重點。

Audrey唔屬於呢個門派，唔係我自命清高，只係嫌麻煩，皆因去一次連搭車動輒三、四個鐘頭，所謂時間就是金錢，值唔值見人見智。

當然，我都去過呢啲活動取經。如果你問我，呢啲講座有無用？我唔否定佢嘅價值，尤其新手爸媽，對懷孕、湊B白紙一張，而講座往往會請助產士等專業人士教授基本功，一聽無妨。但主辦單位通常比較貪心，想喺短短一、兩個鐘灌輸大量資訊畀聽眾，所以演講節奏明快，內容亦只能蜻蜓點水。好老實，你花一、兩個鐘自己上網查資料，肯定深入過佢。

醫管局嘅講座質素又如何？我認為節奏控制較好。以Audrey喺威爾斯參加嘅「初生嬰兒護理」為例，一個半鐘嘅課程集中教幫BB沖涼、餵奶及出院後護理，惟人數比例依然偏高，一個姑娘對成50人（起初我仲幻想係小班教學），要靠自己留堂請教。最麻煩嘅係要親身去醫院報名，無得電話預約，諗起都覺得頻撲。

（本欄逢周一、四刊登）