順產定開刀？

「怕痛唔係藉口，你應該諗下邊種分娩方法對BB最好，唔係淨係諗自己。」與好友Candy分享因為怕痛而諗住開刀生仔，作為過來人嘅佢，卻勸我諗清楚係咪有開刀嘅必要。

開刀分娩會留有疤痕、復元時間較長，呢啲後果我一早知，但原來開刀生亦可能影響到BB嘅健康。

「首先，順產肯定對BB嘅肺功能好啲啦！」Candy指出。點解又關肺功能事？原來當我哋陣痛時，子宮會有規律咁收縮，呢個步驟會對BB嘅肺部擠壓和擴張，從而促進BB嘅肺功能，同時，由於BB頭仔都受到壓迫，刺激到佢嘅腦部呼吸中樞，所以出世後好快就識正常呼吸。咁亦都解釋咗，點解開刀生嘅BB後天會較易患上呼吸系統疾病。

Candy一邊講，一邊引述手機上嘅新聞︰「呢度仲話，BB經過產道出世，可將呼吸道入面嘅羊水、黏液等排擠出來，減少出現併發症嘅機會！」亦有研究指，順產嘅BB免疫力會較高。

另外，Audrey我亦發現，原來上一胎開刀生，有機會增加媽媽生第二胎嘅風險。原因係開刀時，醫生唔單止會剖開媽媽嘅肚皮，子宮亦留有傷口，如果下次懷孕時，胎盤植入咗上次嘅子宮疤痕上，就會出現所謂「植入性胎盤」嘅情況，分娩過程有機會導致大量出血，嚴重的話更可危及性命，需要切除子宮保命。

基於上述種種，除非有必要嘅醫療需要，例如BB無掉頭、臍帶纏頸等情況，否則醫生都傾向建議孕婦試下自然分娩。難怪我老友聽見我話開刀生，會叫我三思啦！

（本欄逢周一、四刊登）