公院可否揀開刀分娩？

「你真係打算開刀生仔？」Candy問。「係呀，諗住無咁痛嘛！捱一刀，一了百了。」我半開玩笑答，但Candy未有陪笑，仲好認真咁講︰「我覺得你諗清楚好啲。」

開刀、順產，明明只係二揀一，卻令唔少孕媽媽陷入選擇困難。好似Audrey咁想開刀生嘅媽媽，唔少都因為怕經歷漫長而痛苦嘅陣痛和分娩過程，所以捨難取易。

由於公立醫院只會為有特別需要嘅個案（如BB無掉頭，分娩時唔係頭向下而係腳先出；BB臍帶纏頸；或者媽媽胎盤前置，有機會於分娩時大量出血等）開刀分娩，否則一般都會安排大肚婆順產。所以若非有上述需要，又想開刀嘅媽咪，只能夠轉投私院。雖然喺私院生一次埋單起碼5萬至10萬元，但普遍人都相信私院能提供更高質素嘅護理及照料，唔少中產家庭都唔介意使呢筆錢。

不過Candy嘅着眼點唔係呢樣︰「我覺得怕痛唔係藉口，你應該諗下邊種分娩方法係對BB最好，唔係剩係諗自己。」佢一句當頭棒喝，令我如夢初醒。平日我總係「懶精明」，今次卻被恐懼蒙閉了雙眼。

Candy續指︰「開刀生只係先甜後苦，你生嗰下可能唔痛，但當麻醉藥散去，傷口癒合時間會較長，會痛一排。自然分娩的話第二日就落到床，較快復元。所以你話怕痛而開刀，根本說不過去。」我點頭。「亦有研究指，開刀生嘅BB，無順產嘅BB咁健康㗎！」「吓，咁㗎咩？」當晚回家，我即刻上網搜尋Candy所講嘅事，發現佢所言非虛。關於開刀及順產嘅利弊，下期再講。

（本欄逢周一、四刊登）