私院生仔要預幾錢？

「有錢梗係去私家生啦！你知唔知我嗰日入到公院產房，居然連『笑氣』都無得吸，痛咗我幾耐？剪會陰又剪得唔好……諗番起成個分娩過程都好崩潰。」原本我諗住喺公立醫院生仔，點知畀阿Wing嚇一嚇，即刻想轉軚去私院。

返到屋企，我問老公︰「你知我一向怕痛，如果我想喺私家醫院開刀生仔，你話好嗎？」雖然屋企嘅財政向來由我打理，有無錢轉投私院，我心中有數；不過生仔始終是我哋兩個共同面對嘅人生大事，我唔想自把自為決定一切。

「OK呀，你想喺邊度生都可以。」老公用雙手環抱我同肚裏嘅BB，溫柔回答，希望將最好留畀我哋。雖則得佢同意，但考慮到BB出世後仲有好多錢要使，我唔想咁快用咗一大筆錢，所以開始搜集資料計一計預算。

根據身邊朋友嘅經驗，現時喺私家醫院生一個細路，門檻介乎5萬至10萬元不等，主要包括住院費及醫生費兩條大數，佔總開支約八至九成。選擇開刀生，費用會比自然分娩高。另外仲有好多附加收費︰譬如喺非繁忙時間生要加錢；選用無痛分娩，要額外請麻醉師；醫生巡房又一筆；若果BB出世有黃疸要照燈，或需要其他治療，當然要另外收費。

唔少人都會搵平日幫自己做產檢嘅私家醫生接生，你可以先問佢喺邊間私院掛單，然後再去繳交留位費。想自然分娩嘅媽媽留意，部分醫生開宗明義只接開剖腹分娩，唔接順產，記住早啲問、早啲約，免得個肚籮咁大先嚟頻撲，得不償失。

（本欄逢周一、四刊登）