大肚唔好食泰國菜？

「大肚嗰陣千祈唔好同屋企人食泰國菜，你一定會後悔。」阿Wing幫囡囡紮頭髮時愈講愈激動，搞到囡囡喊晒口。

「唔食辣啫，仲有好多嘢可以食㗎？」我不明所以。「梗係唔係啦，中伏位就多啦！」雖然懷孕已經係兩年前嘅事，但對為食嘅阿Wing嚟講，簡直恍如昨天。每次佢見到大肚嘅朋友，都會重提往事，以作忠告。

「首先，辣嘢就唔使講啦，即係辣炒、咖喱、冬蔭功都無你份喇；蝦、蟹呢啲容易致敏嘅海鮮，你亦唔使旨意掂。」佢一邊講，一邊舉起指頭數。「後來我諗住叫個木瓜沙律同小食拼盤填肚，點知阿媽講完木瓜基因改造唔好食，阿姨又加把口話炸小食熱氣，唔畀叫！都算啦，一次半次我忍下口，諗住成晚淨係食個菠蘿炒飯就算數。」

「吓，菠蘿咪又係敏感？」我反問。「Exactly，我阿爸正正係咁講，話會惹濕疹，仲『溫馨提示』我一陣唔好叫芒果糯米飯㖭呀！聽見咩都畀人ban，我真係堅嬲，決定嗌杯果汁下火。點知當我同waiter講『唔該畀個椰青我』嗰陣，佢哋夾埋都無咁齊大叫『椰青涼呀！』嗰下我真係崩潰……」

懷孕期間同屋企人食飯，真係一場學問。我陀B時並無阿Wing咁多飲食禁忌，只係聽從西醫所講，避免食用容易被細菌感染嘅食物，例如生雞蛋、刺身、半熟芝士等。當然，每個人體質唔同，如果有咩食咗唔安心、唔舒服，自己要識避忌。相信無一個媽媽會為咗貪口爽而罔顧BB健康，你話係咪？

（本欄逢周一、四刊登）