公院預約三部曲

「點解你有咗仲咁懶懶閒？」阿Yan一見到我就問。「吓，依家有咩要做？」而我仲係懵盛盛。

阿Yan係第一個知道我大肚嘅密友，舊年初為人母嘅佢，不時喺陀B歷程點醒我，令我喺懷孕過程行少好多冤枉路。

「打咗去醫院約檢查未呀？」「但我仲未諗好喺公院生，定喺私家生喎。」「你身為香港人，喺公院做產檢係你嘅權利，約咗先啦！」「知道。」

第二日，我好聽話咁根據阿Yan指示做booking。為方便大家消化，我將公院登記產檢嘅過程，簡單歸納為「公院預約三部曲」︰

第一步，係前往所屬醫院登記。何謂所屬醫院？好簡單，其實就係睇你住邊區。以我為例，本身係新界東居民，就要去威爾斯登記。當然，Audrey亦耳聞唔少人因瑪麗醫院風評好，選擇跨區分娩。不過都唔係你話跨區就跨區，事關登記時需要提交住址證明（另需要帶身份證及醫生證明你有咗嘅轉介信）。

第二步，建議你先去私家診所照一次超聲波。現時公院有向孕婦提供免費「唐氏綜合症產前篩查」，幫你睇下BB有無先天缺陷。由於呢項檢查須在懷孕11-13周六日內進行，若你無照超聲波，醫院一般根據你最後一次來經時間嘅第一日，推算你嘅預產期，但咁樣未必準，所以照個超聲波就最穩陣。若果照完發覺預產期同原先估算有多過七日誤差，就要改期做唐氏篩查啦！

第三步比較簡單，就係致電你所屬區域嘅健康院預約做產檢。第一次檢查懷孕三個月先做，之後再分享。

（本欄逢周一、四刊登）