騙徒手法層出不窮

冇人鍾意畀人呃！我更加憎畀人呃！所以通常見有少少勢色唔對，立即撤退。我有兩部電話，一個專係用嚟訂外賣、book位，同唔熟嘅人聯絡用嘅電話。呢個電話打嚟通常係白撞。因此呢個電話響，我接通咗頭嗰兩分鐘，都唔出聲，跟住就收線。預防被騙，都算做足功夫。警方都形容電話騙案已經係社會問題，騙徒手法亦層出不窮。

而我今個禮拜，竟然遇上窮追不捨嘅騙子電話。首先我睇到6703 XXXX呢個貌似外賣人員打嚟確認接收物品號碼，一接聽，對方用普通話話佢係國安局，雖然佢講得出我個名，叫我去金鐘⋯⋯「咔嚓」，我已經cut線。佢再打嚟，我再cut線。之後block佢呢個電話號碼。佢竟然用6264 XXXX另一個電話號碼打嚟，我一聽到普通話，cut線！block號碼！佢再用6065 XXXX打嚟鬧我點解咁大膽cut國安局電話！真係逼上梁山！本來唔出聲cut線嘅我，好激氣！「拉我吖！我而家搵警察拉你！」之後收線block埋佢呢個電話號碼。

{{hket:inline-image name="564890.jpeg"}}{{/hket:inline-image}}

（作者提供圖片）

之後我打去防騙熱線睇吓有冇呢三組電話號碼，未有。真係世風日下。而家騙子偷呃拐騙不特止，仲用齊軟硬兼施，再加埋AI技術，我真係驚抵擋唔住！所以更加要提高警覺性，慎防各種詐騙手法，面對陌生電話或簡訊，提自己「冷靜、求證、撥打18222」，做足防詐三步驟。

詐騙通常利用人性慾望、恐嚇同投機心態令市民跌入陷阱，可能因為一秒唔夠謹慎就中伏。所以大家真係要步步為營，小心小心！

（本欄逢星期四刊登）