提防騙子

我已經好耐無接聽電話了。每日10個電話中，起碼有8個係推銷或詐騙電話，通常未聽到佢哋講第二句，我已經cut綫。呢個禮拜日，我接到一個自稱係某某銀行嘅電話，話要了解我申請嘅信用卡資料！

點呀？星期六下午，銀行都休息啦，仲要星期日打電話嚟，真係有無人會上當先？以前最多聽到係呃阿婆生果金，而家科技先進，詐騙對象不分男女老中青，總之有殺錯無放過！手法層出不窮，無孔不入，真係要提高警覺呀！

你話遇到漁翁撒網式電話詐騙，都可以即時cut綫了事，因為通常佢哋都未必係好專業嘅騙子，會畀你發現破綻。但如果你唔好彩，遇上一啲早有計劃預謀要呃你嘅，咁真係要明察秋毫，先可以避免掉入對方精心設計嘅陷阱中。

好多騙子都係玩弄情緒嘅高手，佢哋可以隨時運用三寸不爛之舌引發「獵物」嘅貪念。此外，騙子亦好鍾意操縱人嘅恐懼心理，指使受害人乖乖聽命行事。

現代人工作忙碌，社交平台亦成為好多人認識異性嘅熱門工具，然而稍有不慎，亦好容易可能墮入愛情陷阱。例如Netflix紀錄片《Tinder大騙徒》，就講述三位女性，喺交友平台Tinder上，畀同一位男性欺騙感情同騙財的真實故事。

好多新興詐騙手法會結合「假交友」同「投資詐騙」，先透過交友名義吸引被害人注意，再以溫情攻勢慫恿被害人一齊加入投資或操作外滙期貨，令被害人愛情同金錢都被騙走，我自己講到嚟呢度都不禁打個冷震。

以上例子只係詐騙手法嘅冰山一角，總之要將「提防騙子」呢4個字時刻提醒自己！

（本欄逢周四刊登）