老婆圓潤孕味濃 陳展鵬戲言帶單文柔把脈

由黎諾懿監製的親子真人騷《爸知弊！你嚟湊吖！》將於下周播出，嘉賓之一的陳展鵬和太太單文柔（Phoebe）昨日出席記者會。Phoebe身形明顯較之前圓潤，孕味甚濃，被追問是否有喜，她竟口窒窒兼向老公展鵬求救。

兩子之父黎諾懿昨日與陳展鵬碰頭，即大談兒女經，諾懿大讚展鵬的四歲女兒陳諾瑤（小豬比）十分可愛，更揚言想跟展鵬對親家。單文柔受訪時表示︰「最緊要小豬比鍾意，其實好多家都問緊，之前陳敏之都話囝囝子樂好鍾意小豬比，（好搶手？）我個女性格好男仔頭，所以鍾意同好多人玩。」

昨日所見，Phoebe身材圓潤不少，略見雙下巴，被問到是否計劃追多個小朋友？展鵬和Phoebe一臉尷尬兼支吾以對，Phoebe說︰「唔話你聽，（等足三個月先公布？）老公你出下聲啦！」被追問是否再度懷孕？Phoebe答非所問，忽然稱自己感冒，才令大家有錯覺。展鵬即時「救駕」說︰「有感冒就要睇醫生，我一陣帶佢去睇醫生，睇下會唔會要睇埋婦科先，問下家庭醫生…都係唔好，去把脈好啲，唔好睇西醫。」

黎諾懿陳敏之爭住對親家

展鵬其後轉換話題，提及周日將與陳豪、蕭正楠和陳山聰擔任港姐司儀，展鵬搞笑對Phoebe說︰「泳裝環節我都無辦法，真係唔想咁近，但做司儀唔可以行咁開㗎嘛，所以你唔好怪我，我拎住電話唔係睇女仔，係記班佳麗啲名咋！」另外，諾懿受訪時繼續大讚小豬比，「佢得意到一個點，咁細個就好懂人性，（你要同陳敏之爭新抱？）咁畀敏之個仔啦，我個仔盡得我真傳，你睇佢之前表演，成個鋼琴家咁款，咁就知我大仔有料到啦，將來唔愁無女朋友！」

採訪、攝影：Steven

美術：梁政敏