與鼠同行？

早幾日阿美外出回來辦公室後笑說：「後樓梯的垃圾桶識得變魔術！原先垃圾桶旁邊又多了一個容量更大的。想必是因為我們公司所在的大廈，垃圾桶常常爆滿，長期閂唔埋，不時惹來蛇蟲鼠蟻！」我馬上話：「咁就好喇，希望以後可以乾淨啲，大家就不用再畀老鼠嚇親！」

記得早幾個月，我剛踏出走廊，準備去洗手間，就聽到同事Joyce大聲尖叫。我即刻跑去後樓梯，看見她面青口唇白、三魂唔見咗七魄，原來她看見一隻大老鼠，從垃圾桶裏跳出來後，不用半秒就消失了蹤影。阿美插嘴說：「呢幢大廈其實已經算很乾淨了！」她剛從巴黎旅行回來，真的通街都見到老鼠！早排有新聞提到，巴黎市政府正式宣布放棄滅絕老鼠，巴黎居民必需要與老鼠和平共處！

想想即使在香港也是，雖然滅鼠工作從來沒有停止，但是在街上，尤其是食肆林立的舊區，鼠患問題依然十分嚴重，有時甚至日光日白也見到鼠蹤。難道就此讓老鼠佔領地球？公司樓下的舖頭都有養貓，店主說是養來捉老鼠！我想既然Joyce這麼怕老鼠，這幢大廈要不要也養隻貓呢？

（本欄逢周一刊登）