南油服裝批發市場

Joyce甫踏進公司，便高興地對着我們轉圈，轉着轉着，連老闆都出來看個究竟。

「買咗新裙？好靚喎！」Joyce的心情明顯比她的裙子更靚！

「係啊！朋友週末帶咗我同舊同學去深圳南山區嘅南油服裝批發市場，呢條裙就係其中一樣戰利品！係由中國嘅時裝設計師設計㗎！」Joyce難掩興奮的心情回答。

「個cutting又真係幾好，質地都唔錯！」老闆加入討論。

「今次去咗一轉南油，大開眼界，自己真係港燦！整個批發市場十分大，分為4個區域，每個區域主打唔同路線嘅服飾，例如本地原創設計品牌集中喺第一工業區，亦有區域主要賣季尾貨，就好似日本outlet咁，隨時可以優惠價錢搜羅到心頭好！」

「朋友一落車就話要去『101時裝設計師館』，嗰度嘅衫高檔一啲，價錢自然就唔會係幾十蚊件，不過品質絕對對得住佢嘅價錢！嗰度嘅Sales都會着住自家品牌嘅衫做生招牌，我行過見到一位Sales着得靚，問有無得試，佢二話不說就將身上嘅面衫除落嚟俾我試！原來因為嗰度主要做出口生意，所以店內每件衫都可能只得1件，所以如果遇到啱心水，真係要立即扑鎚！」

阿美：「聽你講完，我都好想去啊！」

老闆：「一於搵日組團一齊去！我都想支持吓中國嘅時裝設計師！」

（本欄逢星期一刊登）