黃子華的善心

「你哋最近有無睇到黃子華YouTube頻道嘅新片《黃子華大茶飯》啊？」Shirley問。

「有啊！見佢相隔7年再上載影片，都好好奇條片係講乜，就㩒咗入去睇，原來係幫惜食堂籌款！不過黃子華真係黃子華，雖則係籌款短片，但絕不hard sell，仲發人深省添！睇到我眼濕濕啊……」阿美回應。

「我都有睇呀！仲見到新聞報道話，《黃子華大茶飯》已經係黃子華無償幫惜食堂拍攝嘅第4條短片，佢自編、自導、自演、自費，一個星期就拍成，真係出心出錢又出力啊！」Amy附和。

提起子華神，大家都雀躍，講個不停。

Shirley忽然說：「其實我一直都有去惜食堂做義工，幫手整飯盒，見到啲公公婆婆食得開心，滿足感真係好大。初時惜食堂每日只係提供20個飯盒，今時今日每日可以做20,000份膳食，而家喺沙田嗰間賽馬會食品製作中心起好，有望每日做40,000份，真係好勁！」

「不過我見到有網民話，既然惜食堂有馬會呢啲大機構支持，就唔需要市民做義工啦……」阿美說。

「吓！真係大錯特錯！雖然呢個食品製作中心係喺政府同馬會嘅支持下建成，但得個廠得個硬件點夠呀！都需要籌到食材，以及有義工幫忙，先可以製作到飯盒，送到有需要嘅人手上！」Shirley解答。

「咁又係！你下次去惜食堂做義工，記得嗌埋我！」阿美道。

（本欄逢星期一刊登）