為平稅買樓 恐得不償失

新一份財政預算案尋日出爐，大大小小政策措施數十項，大家最關心嘅莫過於再派消費券同退稅措施。不過今年無論消費券或者退稅都「減甜」，或者令大家有少少失望。

午飯時間撞到工程部Terry，佢急急腳外出，曉陽以為佢「佳人有約」，仲講笑話咁心急？原來Terry咁急係去銀行，為咩事？原來係去查詢買樓開支。

財政預算案其中一個建議措施係減印花稅，喺新例下，664萬元至900萬元嘅單位，都只係繳付3%從價印花稅。

Terry尋日一聽到減印花稅就非常高興，一路行一路問曉陽其實會減省到幾多開支。

曉陽雖然唔知佢打算購買嘅物業價值幾多，但就按最高樓價900萬元嘅物業計算，按照原有印花稅率3.75%，相當於33.75萬元稅款，而調整後將會降低至3%，稅款即約27萬元，慳咗6.75萬元或20%。

呢個數目話多唔多，話少唔少，Terry覺得幾萬蚊都係錢。曉陽當然認同，但問題係現階段利率開支處於高位，減少少印花稅，係咪抵銷到利率開支？

老實講，幾時再減息無人知，會唔會變番低稅率更加話唔埋。但貸款利率長遠係非常大筆嘅錢，即使減印花稅，其實都未必幫到好多。

曉陽就同Terry講，現階段入市確實需要考慮清楚，要計算好自己嘅承受能力，更要考慮恆常開支有無空間。

置業對好多人嚟講，係畢生一個好關鍵嘅決定，因為牽涉嘅開支非常龐大。今次財政預算案減少少稅，固然係幫到一般首置買家減輕負擔，但如果為咗慳稅而買樓，就恐怕會得不償失。

（本欄逢周四刊登）