為拍真人騷爆粗解畫 吳卓羲︰幾順口

早前吳卓羲（Ron）在內地真人騷《大灣仔的夜2》節目中，與謝天華、張智霖以廣東話閒談時，Ron大讚《信樂團》的主音蘇見信（阿信）歌藝高超，卻不慎爆粗，盡見真性情。昨日Ron現身《風再起時》首映禮時大方回應此事，他笑言︰「其實係心內一個讚美，衝口而出講咗一句（粗口），剪接師又無留意，又好似幾順口！（你知道節目會照樣播出？）佢哋理得你，我相信節目組唔知係（粗口），應該唔會刻意播出街，都係得啖笑啦。」

另外，提及在《風再起時》與郭富城（城城）和梁朝偉合作，Ron透露主要與城城有對手戲，「有一場戲講佢拉我，喺車上戴手銬，亦有一場槍戰戲都幾難忘，可以同城城及梁朝偉演戲都好開心，係好好嘅經驗。（有無乘機偷師？）我第一日到片場見到城城，佢一嚟就有戲，真係學到嘢。（可有怯場？）無！自己都有咁上下資歷，以前對住黃秋生、吳鎮宇都係咁拍。」

採訪︰Pauline