《空肚講宵夜》3周年 梁祖堯陳俞希蔡瀚億 感恩令觀眾忘憂

ViuTV節目《空肚講宵夜》前晚踏入三周年，主持梁祖堯（阿祖）、陳俞希（Hailey）及蔡瀚億（BabyJohn）充滿默契，三人互動大受觀眾歡迎，令節目不斷添食。三年過去，Hailey獲得專屬「八婆」稱號，BabyJohn成功偷師做廚神；而阿祖坦言身形「變闊」，他沒有怪罪節目，反而每星期能為港人帶來忘憂輕鬆的半小時，感到非常開心。

《空肚講宵夜》前晚播映三周年特別篇，梁祖堯說︰「三周年轉眼就過，第一次開會嘅畫面依然歷歷在目，當時大家講嘢不斷重疊，扮friend、扮雀躍。」合作愈久，彼此關係愈密切，阿祖和蔡瀚億直呼陳俞希做「八婆」，阿祖笑說︰「我唔會隨便叫人『八婆』，有次我見到一對情侶，男仔拎手機影，女仔就問我︰『可唔可以嗌我一聲八婆？』大佬呀，好地地一對情侶唔好咁犯賤啦，搞到我好尷尬，況且『八婆』呢個名係屬於Hailey㗎嘛。」Hailey笑言︰「連我阿媽都嗌我『快啲去執嘢啦，八婆』！」

「八婆」成Hailey專屬稱呼

拍攝過百集節目，BabyJohn最佩服「大廚」阿祖的創意，「有一次，助導買齊晒食材，準備拍之前先發現原來之前整過呢味餸！阿祖惟有即時改菜式，真係好犀利。」問三人有否拍到變胖？阿祖即用手擠出腰間贅肉，講笑說︰「依家係我人生最瘦嘅時刻，你以為節目所有食物都放落肚？鏡頭一轉，我就吐出嚟…」及後，他解釋其實一個月只有兩天拍攝《空肚講宵夜》，所以變胖跟節目無關，他重申︰「我哋唔係煮食節目，只係我哋攞嚟搞、搵嚟煮…」

Hailey笑言，由第一集食便利店雞髀開始，便一發不可收拾，和牛、龍蝦等食材陸續有來。問到難忘的菜式，Hailey最愛「冬蔭公意粉」，BabyJohn則試煮「海鮮一鑊熟」，可惜嘗試多次都「黐鑊」，經阿祖提醒後學懂以牛油紙墊底。「大廚」阿祖笑言︰「最難忘梗係『維納斯乳頭』，食物味道無問題，但拍出嚟真係好樣衰！」說到難忘的一集，Hailey自言最愛「結婚」那集，「我恨咗好耐啦！」阿祖大讚Hailey說：「『慧妍清叙』，又賢淑又優雅，佢一定比所有香港小姐同亞洲小姐好！」BabyJohn則指Hailey的真命天子一定不會悶：「你嘅世界從此不再冷清！」

與觀眾變成一家人

合作三年，除了主持之間成為真朋友，BabyJohn認為跟觀眾的關係亦有改變，「觀眾喺街遇到我哋時，由最初好靦腆，到依家好似好熟嘅屋企人、朋友咁！」阿祖感激網民支持，更有不少人在社交平台私訊他，「老實講，呢幾年香港人過得唔容易，好多時返工又怕疫情，經濟唔好又怕保唔住份工，社會氣氛又大壓力…好多網民認為星期三晚係佢哋發洩、紓壓嘅時間。畀大家忘憂半個鐘，係一件好事！」

【一按睇片】

服裝︰SUNCOO（陳俞希）

撰文︰楊安莉

美術︰梁政敏

攝影︰陳健珊、何家賢、王華婷