拍《I SWIM》回想追夢過程 吳海昕無悔選港姐入行

ViuTV游水偶像劇《I SWIM》正熱播，觀眾焦點自然落在半裸曬肌的男角身上；不過在劇中帶領C班泳隊出戰的「Miss翁」吳海昕（Sofiee），笑言絕不介意被觀眾忽略，反而拍攝時讓她回想自己追夢的過程，亦無悔自己14年鼓起勇氣選港姐。

吳海昕拍攝《I SWIM》期間，經常見到男拍檔大曬肌肉，包括MIRROR成員呂爵安（Edan）、邱士縉（Stanley）、王智德（Alton），以及魏浚笙（Jeffrey）等，Sofiee十分佩服他們為身形忍口︰「平時放飯，佢哋只食幾隻烚蛋、雞胸肉，而我食緊好肥膩嘅飯盒…佢哋埋位前做掌上壓谷肌，冬天落水又唔怕凍。我睇到佢哋都覺得好熱血，自己心態都『回春』，唔係講外表，而係我見佢哋演中學生，都會諗起自己細個想去追逐夢想。」Sofiee大爆他們相當「姿整」︰「佢哋補粧，第一時間補啲『朱古力（腹肌）』，因為呢樣嘢一除衫就無得呃。」

說到追夢回憶，Sofiee參選2014年香港小姐，結果大熱倒灶，但她無悔參選︰「選美前我做緊空姐，我無諗咁多，只想轉換一下生活模式。」她曾到紐約電影學院（New York Film Academy）修讀電影表演文憑課程，「我想知自己有咩不足，當時我好無信心，諗緊自己係咪適合呢行？所以我想去睇下自己係咪鍾意（演藝工作）。其實好簡單，如果傾家蕩產，戶口無晒錢，你都要去做，即係代表揀啱咗職業。我以前做過一份工，有唔想返工嘅感覺；依家我收到劇本，就算無對白都好開心，呢個就係我嘅理想職業。」

30歲成事業轉捩點

現年32歲的Sofiee，30歲時在劇集《二月廿九》演女主角Yessa，成為事業轉捩點。「我30歲前無人搵我做主角，30歲後工作量增加，呢個係我人生幸運嘅起步。所以唔好放棄，就算有99個人鬧你，但有一個人支持你，你就為嗰一個人堅持，我就係咁一直行落去！當我好想放棄時，我就睇番以前嘅作品，就會唔甘心觀眾對我嘅記憶點只係停留喺呢齣作品上，想陸陸續續有更多戲拍，我希望自己嘅成績表唔好咁快就停。」

【一按睇片】

髮型︰Zap Tang @toniandguyhk.official

化粧︰Onki Lau

服裝︰Valentino

形象︰PIPA Creative

撰文︰黃曉妍

美術︰梁政敏

攝影︰黃敬博、何家賢