任衛蘭個場嘉賓 MC張天賦爆曾月花$800聽歌

衛蘭（Janice）一連三場紅館個唱前晚落幕，尾場邀得MC張天賦任嘉賓。MC自爆小學時情迷Janice︰「《離家出走》係頭兩隻我畀錢下載嘅歌，嗰陣每次下載都要20蚊；當時魚蛋粉16蚊碗，我竟然收到一張800蚊嘅電話費單，最後被老竇毒打咗一餐！」由於MC不時被拍到與女生逛超市，連Janice也不禁「抽水」︰「點解我哋成日分別喺超級市場被人影到？」令MC無言以對。

至於在頭場時，鍾舒漫（Sherman）於台上分享了十分鐘個人感受，被網民鬧爆「騎劫舞台」。Sherman認為大家的評語合理︰「我理解網民嘅講法，自己諗番都有啲嬲，當時分享係有啲亂同緊張，同團隊溝通都有啲錯誤。」而Janice亦戥好姊妹不值︰「係我邀請Sherman分享嘅，可能佢太激動忽略咗時間，我叫佢唔使理（負評），佢都係用心分享自己脆弱一面。」