《食腦喪B》吸正評 何廣沛︰觀眾可能無期望過

何廣沛、江嘉敏（Kaman）及陳曉華（Hera）等昨午宣傳無綫劇《食腦喪B》，日前播出的一集中，何廣沛率領一眾演員與雪妮玩蛋糕大戰，他大讚這位前輩非常玩得︰「本來無諗住整蠱佢，但雪妮姐好主動話想一齊玩，加上今次係佢退休前最後一齣劇，希望製造難忘回憶畀佢。」談及劇集首周收視僅得18.2點，何廣沛回應道︰「套劇上年已經喺收費平台播咗，好多fans已經睇咗，加上恢復晚市堂食都有影響；不過都有網民話『無諗過咁好睇』，我明白可能因為無期望過，所以當係bonus。」

另外，Kaman及Hera皆負腳傷到場宣傳，前者更坐輪椅到場，活動時才站起來。Kaman稱︰「頭先都有拍《回歸》，好彩啲場口都係行下、企下，本來上星期好啲，但呢排多郁動，嚴重咗。」Hera則透露平日有戴足部固定器，否則要等半年才能完全康復。

採訪︰Steven

攝影︰林良明