囝囝打鼓曬音樂天份 古巨基幻想父子同台演出

古巨基（基仔）與太太陳英雪（Lorraine）育有兩歲多兒子古晋匡（Kuson），自從升呢當爸爸後，基仔不時於社交網分享囝囝的生活點滴。前日是兒童節，基仔特意上載Kuson打玩具鼓的新短片，見Kuson打鼓有板有眼，音樂感十足，似乎盡得爸爸真傳。

基仔留言道︰「我哋之前買玩具畀Kuson，都會買啲樂器玩具，小keyboard（鍵盤）、ukulele（夏威夷小結他）、xylophone（木琴）…不過都係偶然玩一玩。但係唔知點解Kuson早排成日話想play drum，於是買咗玩具鼓…呢兩日無論瞓醒覺、食飯前、食飯後、臨瞓前，都係打鼓！我覺得好神奇，佢好似好知道自己嘅興趣、天份，自己揀咗一樣我無特別推薦畀佢嘅嘢。」基仔直言幻想着將來與Kuson同台演出，並笑說︰「佢咁鍾意打鼓，唔通因為我幫佢改名叫Kuson？鼓神？」