張秀文教堂出嫁 媒人林盛斌催早日開枝散葉

「金牌媒人」林盛斌（Bob）早前成功撮合張秀文（Sammi）與金融才俊王大權（Billy），兩人昨日低調舉行婚禮。Bob昨日上載與一對新人的合照，留言︰「又搞掂一單！恭喜恭喜！」他昨日接受《晴報》訪問時表示︰「好開心見到佢哋有情人終成眷屬，佢哋完咗簽紙儀式，同埋影完最重要嘅男家女家合照之後，主持人開咪叫我單獨同佢哋影，突然之間覺得自己地位好崇高，哈哈！」

Bob續說︰「最好笑係佢哋爸爸媽媽同親戚不斷同我講多謝，有親戚仲問我有無筍盤介紹畀佢個女；仲有新郎哥實在太客氣，無啦啦塞咗封利市畀我，我話唔使搞呢啲嘢，佢話一定要收，搞到好鬼尷尬，哈哈！總之衷心祝福佢哋幸福快樂，快啲生幾個小朋友啦！」