雲浩影明年闖樂壇 王梓軒答應寫歌加持

王梓軒（Jonathan）日前與《全民造星III》參賽者雲浩影（Cloud）到尖沙咀出席COACH旗艦店聖誕活動，原來兩人十年前已曾同台，今次則是他們首度在活動上碰頭。Jonathan大讚Cloud︰「Cloud大個咗好叻呀，唱歌好聽，講嘢又叻，又靚啦！」𠱁得Cloud開心不已。

而Cloud明年有望以新人姿態闖樂壇，她表示︰「同公司有共識，下年會出一連串嘅歌，希望可以出道做新人，如果有機會我都好希望可以同Jonathan合作，睇佢肯唔肯啦？」Jonathan即表示︰「唔會唔肯啦！我哋從來都無合作過，細個時同台過，係一個緣份；其實一路睇住佢成長，我都希望可以喺佢音樂同演藝路上有少少參與。」