接連播出孭飛劇集 胡鴻鈞直認未夠班爭視帝

無綫台慶劇《十月初五的月光》即將大結局，之後將緊接播映同樣由胡鴻鈞（Hubert）孭飛的《愛上我的衰神》，被問是否為爭奪視帝鋪路？Hubert即強調自己未有資格爭視帝，亦無需為自己拉票。

胡鴻鈞、何依婷、羅天宇、姚嘉妮及鄺潔楹（Judy）等昨日出席台慶劇《十月初五的月光》宣傳活動，提到劇集收視超過20點，一眾演員都相當高興，何依婷透露大結局當晚將會與一班演員齊齊吃飯，Hubert笑說︰「到時何依婷會攞兩萬蚊出嚟抽獎！」惟何依婷反問︰「唔係我同你同羅天宇一齊夾咩？」Hubert則表示屆時會買禮物抽獎，並自薦唱歌助興。

問兩人會否想再合作？Hubert笑謂︰「唔需要。（唔想再合作？）有機會嘅話都想再一齊拍劇，但依家何依婷咁忙，都要睇下佢有無期。」

鄺潔楹求學被欺負

另外，緊接《十月初五》播出的《愛上我的衰神》，同樣由Hubert擔正，問他是否衝擊視帝？Hubert耍手否認︰「唔關事，劇集幾時播出由公司安排，我真係無諗過會攞視帝，亦未有資格攞，所以唔使拉票，大家投自己鍾意嘅演員啦！」

至於在劇中飾演霸道富家女「萬沛琪」的Judy，表現亮眼，她解釋是透過自身經歷來揣摩角色︰「當年喺美國讀書，我係班上唯一一個亞洲人，被個美籍白人女同學『蝦』，有次佢仲爭啲郁手打我，好彩保安出手阻止，所以我演繹呢個角色嘅時候，就套用番對方當時『蝦』我個樣。」Judy又劇透其角色將會毀容，因此會有爛面化粧，拍攝時也特別小心，不能有太大動作，以免爛面粧甩掉。

採訪︰Pauline

美術︰梁政敏