開騷意外跌落台 鄧建明手指受傷照演出

夏韶聲與太極樂隊成員鄧建明（Joey Tang）前晚在九展Star Hall舉行一連兩場的演唱會。期間Joey Tang發生意外，落台時連人帶結他在一米多高的舞台跌下，幸好只傷及左手食指，經治理後昨晚尾場如常演出。

剛過58歲生日的Joey，前晚特意獻唱MIRROR成員姜濤的歌曲《孤獨病》，送給身在澳洲讀書、已一年半無見面的兒子；又以自己作曲的《一加一減你》及《放棄我天地》送給太太，並透露曾因兒子升學問題與太太有拗撬，感激太太肯遷就。不過，當Joey摸黑落台時，不慎從一米多高的舞台上跌落地，幸好他只傷及左手食指，貼上膠布後便繼續演出。個唱尾聲時兩人上前多謝觀眾，Joey亦指着台邊叫夏韶聲小心。

兩人在騷後受訪，只見Joey手指敷冰，他回想意外說︰「我落台時行錯位，以為仲有一級樓梯，我用隻腳試下，點知跌咗落去，好彩個台唔算高。我個頭同結他撞落地，結果都無事，只係結他夾到手指。隻手指郁到，同埋幫我訓練體能嘅治療師喺度，佢都係醫生，即刻幫我敷冰。」夏韶聲笑言當時正在台上演出，看不到意外經過，又搞笑說︰「如果知就跟埋跌落台，下半場唔使開。」

已找物理治療師治理

Joey笑言不擔心傷勢影響演出︰「今次用三隻手指彈，可能仲好聽過平時。」他昨日中午已找物理治療師治療︰「謝謝大家的關心，物理治療師會用鐳射設施幫我治療，加上昨日（前晚）不停敷冰，令傷勢沒惡化、沒腫脹，現在手指可以屈曲，今晚（昨晚）包紮後可以照常演出。」

撰文︰Iris

美術︰梁政敏