遺傳父親馬德鐘爆肌身形 23歲馬在驤拒當小鮮肉

馬德鐘（馬神）聯同囝囝馬在驤（Xiang）父子檔參演的無綫輕鬆小品《我家無難事》今晚大結局，雖然父子於劇中從未同場鬥戲，不過近日二人頻頻見報，Xiang的黝黑皮膚兼男人味十足的外形成為網民話題，他揚言堅拒當白淨小鮮肉︰「我唔會刻意迎合市場！」絕對忠於自己。

在《我家無難事》中，馬神飾演無賴郭得勤，而Xiang則扮演爸爸的年輕版。Xiang在劇中駕駛電單車的鏡頭男人味爆燈，跟向來又型又chok的父親相比，絕不失禮。雖然有網民認為23歲的Xiang外貌比實際年齡成熟得多，幸好《我》劇成功掀起話題，令更多香港觀眾認識這位身高達190cm的星二代。馬神不諱言今次囝囝的處男演出是人生難得的機會，特別感謝《我》劇監製王心慰的邀請︰「今次剛剛有個我嘅後生角色，囝囝又得閒玩下。」父子留在家中欣賞對方演出，馬神坦言︰「睇劇變咗親子時間，睇完劇當然有賽後檢討，畀啲意見囝囝，亦一齊睇電影或其他劇集。」

累積經驗冀演反派

對於父子檔正式同場拍戲，馬神笑稱︰「呢啲要睇緣份，如果有咁嘅機會都好正，不過要睇天時地利人和。」對於自己的處男演出，Xiang坦言︰「我諗只有50幾分，咁樣咪幾好，多啲進步空間。」馬神亦認同囝囝表現只值50分︰「唔可以畀咁高分，要佢努力改進。」他指囝囝在演出技巧及對白等方面仍要累積經驗。早前馬神曾稱接受與囝囝在戲中「爭女」，對此Xiang卻有其他想法︰「我希望做反派，應該幾好玩。」馬神更認為父子如拍攝對打戲，定必非常過癮。談到男新人發展一般看來較女新人蝕底，馬神為囝囝送上鼓勵︰「好多女新人好快就同當紅又有經驗嘅男星拍戲，反而男新人就好少呢種機會，所以要更努力。」身為新人，Xiang亦不想太快上位做主角，寧願嘗試不同角色︰「我覺得要儲多啲經驗先再諗，始終做男主角壓力大。」

馬神挺娛圈百花齊放

不過，今年娛樂圈可謂小鮮肉天下，ViuTV的人氣男團MIRROR冒起，成為不少港女心中的男神。而從澳洲回港的Xiang，其粗獷男人味形象與眾不同，他對自己信心十足︰「畀大家唔同選擇唔好咩？我唔會刻意迎合市場。」馬神亦為囝囝護航說︰「潮流都可以有唔同形象，我相信唔會清一色時興同一類人，好似我哋劇集男主角，都有好多唔同種類嘅演員。」Xiang不諱言若有合適角色，即使揮刀剪下長髮亦在所不惜。他說︰「我做『光頭仔』都得，或者演救生員都好，因為係我老本行！」

Xiang現為大學四年級學生，仍然留港的他目前於網上上堂，亦要準備功課，他透露將在數月內重返澳洲繼續學業。提及何時全身投入演藝事業，Xiang強調暫以學業為重，而馬神亦說︰「每個人對未來有唔同睇法，佢享受自己鍾意嘅生活已經足夠，從事乜嘢職業一樣支持。」對於新冠疫情肆虐近兩年，Xiang留港期間最感恩的，除了一試拍劇滋味，與父親的感情亦有升溫︰「多咗時間陪爸爸同愛犬，當然可以同佢拍劇都好開心，因為佢之前都忙，好少見面。」Xiang身為游泳健將，在港亦有抽時間練水，難怪能夠保持完美身形。

場地︰Veda（Ovolo Central）

服裝︰EVISU

化粧︰許智華

髮型︰Sue Cheung @Saloon•Festival Walk

撰文︰Steven

攝影︰林良明

美術︰顏玉玲