與女友沙律有夫妻相 保錡︰代表我無咁樣衰

男團ERROR成員吳保錡及香港男子劍擊代表隊成員張小倫等，昨日出席Now Sports宣傳活動，保錡跟女友張沛樂（沙律）被指撞樣有「夫妻相」，保錡說︰「我一向被人話樣衰，高攀緊沙律，依家被人話似樣，係咪代表我無咁樣衰呀？」

同場的張小倫在奧運後經常開直播，因而人氣急升，更獲三家電視台邀請他上節目講鬼故。他表示︰「之前幾個月都要比賽，唔喺香港，依家放個假先，鬼故就慢慢嚟，一定講畀大家聽！」提到隊友張家朗以亂髮配粗眉拍攝時裝照成為話題，張小倫力撑︰「佢依家咁後生，打扮比較前衞係接受嘅，我覺得無問題吖！」

採訪︰楊安莉

攝影︰林良明