港姐決賽或撞正打風 曾志偉安排張學友預錄環節

《2021香港小姐競選》決賽將於周日舉行，有機會撞正熱帶風暴「康森」襲港，無綫副總經理曾志偉昨日出席記者會時，表示已安排嘉賓張學友預錄戶外表演環節，以便打風時作節目調動。

曾志偉昨日出席港姐記招，提到雙旋「康森」及「燦都」來襲，天文台預料「康森」將於周末最接近本港，可能撞正港姐決賽，志偉表示已有三手準備︰「啱啱搭咗個戶外場地，因為表演嘉賓張學友嘅環節喺戶外，所以安排佢預先錄影，到決賽當日，如果天氣唔影響戶外演出，學友會現場live表演，如果落雨打風就播片。」提到C君（鄭詩君）獲委任為J2台創意總監，志偉笑言C君負責度蹺：「不過我無叫C君唔好做幕前，佢搵唔夠（錢）就會出番嚟。」他又揚言想招攬C君拍檔陸永：「（畀咩職位陸永？）畀個前座位佢！」

陳聖瑜生眼瘡變「獨眼龍」

提到C君上任後，J2台即宣布《#後生仔傾吓偈》本月停播，但C君否認是「劊子手」，志偉聞言笑說：「佢（C君）實話唔係佢㗎，是但啦，其實《#後生仔》都做咗800幾集，好多話題已經講過，加上啲主持個個入晒劇組，所以經商量後停一停，日後用新模式再呈現。」

另外，12位候選港姐昨日會晤「最上鏡小姐」評判，席上宣布④關楓馨、⑧宋宛穎及⑬王嘉慧為觀眾投票最愛的三位佳麗。而③陳聖瑜因生眼瘡要做小手術，昨日她的左眼貼住紗布亮相，她無奈說：「我都擔心會扣分，但都無辦法，惟有逆來順受。」

採訪︰倪小珊

美術︰梁政敏