「星妹」齊入圍 193胞妹郭嘉盈殺入《造星Ⅳ》

ViuTV成功捧紅男團MIRROR及ERROR，即將舉行的《全民造星IV》將改為女團選秀騷，昨日96位入圍參賽者正式亮相，當中有不少「星妹」，包括余香凝的妹妹余潔滢（Zoe）、歐陽巧瑩的妹妹歐陽巧霖及郭嘉駿（193）妹妹郭嘉盈等；入圍者中亦不乏去年《造星III》的參賽者。

ViuTV昨日舉行《造星IV》記者會，96強參賽者首度現身，當中包括「星妹」余潔滢、歐陽巧霖和郭嘉盈，她們昨日受訪時，均認為「星妹」沒有任何優勢，反而令她們更加努力，讓觀眾留下好印象。問郭嘉盈哥哥193可有給予比賽貼士？她笑言︰「阿哥睇死我入唔到圍，不過佢知道我入咗，都有畀意見。」而Zoe就指家姐余香凝給了她一封四位數的利是，以示祝福和支持；至於歐陽巧霖亦透露家姐歐陽巧瑩給她四位數字的置裝費用。

殘暴方式逐個踢走

另外，去年《造星III》20強方芷欣（方方）和夏子涓今屆捲土重來，方方坦言去年輸掉比賽不甘心︰「好想入十強，上年輸在玩得唔夠精，好多項目都唔擅長，覺得自己有啲嘢仲未騷出嚟。」而子涓同樣是以十強為目標，她自覺廣東話不佳，會加緊練習。

一手捧紅MIRROR和ERROR的黃慧君（花姐），認為參賽者的親和力很重要︰「總之唔會一望就想反佢眼，同埋最緊要唔怕蝕底、夠真、肯捱。」花姐強調會以殘暴的方法把參賽者逐個淘汰。另外，問到早前C AllStar經理人阿拔批評MIRROR壟斷廣告市場，花姐表示︰「嗰下真係嬲咗，我都話帶MIRROR入嚟唔係要賺大錢，係想佢哋唱多啲歌同做戲，（有無同MIRROR講番？）有，佢哋反而安慰番我轉頭。」

採訪︰Pauline

美術：梁政敏