IG求限量版波鞋惹KOL炮轟 193粉絲嬲嬲豬︰抽錯水好黐線

郭嘉駿（193@ERROR）近日再惹是非，日前他在IG限時動態徵求購買限量版波鞋的妙法，被KOL「家明」抽水指193「搲鞋」，並鬧爆「明星唔係咁做」。不過，網上輿論一面倒狠批家明抽錯水、為鬧而鬧，193更在對方的發帖上取笑他「你真係唔識㗎喎」。昨日193繼續在IG上載潮look型仔相，心情似乎未受影響，不少網友亦撑他繼續做自己。

早前193在IG限時動態上載兩對限量波鞋的照片，並在圖片以英文留言︰「我想要這兩對，US12（鞋尺碼），有無人幫到手呀」似乎向網民徵求購買方法。KOL家明隨即發長文向193開火表達不滿，以「明星，唔係咁做的」為題，並謂「藝人搲job見得多，搲鞋第一次見。」然而，不少網民卻對家明的帖文大表不滿，紛紛留言支持193，並寸爆家明抽錯水。193亦在家明的「抽水發帖」直綫還擊︰「你真係唔識㗎喎」，該留言錄得逾12,000個like，比起家明原帖文的like數更多，可見不少粉絲力撑193。

參演劇集美國播放

其後，193上載NBA球星Isaiah Thomas同樣於限時動態求鞋的截圖，指「好多門外漢真係唔識㗎喎」。面對外界輪流指責，前晚家明在FB出po宣布封筆。至於193，昨日傍晚於IG上載自己配襯簡單服飾的靚仔相，並寫道︰「放假嘅時候我唔會gel頭，甚至唔吹頭就直接出街，知我咩料啦。」看來心情大好。

此外，193有份參演的ViuTV偶像劇《男排女將》即將衝出香港，本月18日起在美國加州灣區的KTSF26頻道播放；早前ViuTV翻拍同名日劇《大叔的愛》在港爆紅，日本的電視台亦決定於今年秋季播出香港版，認真犀利！

撰文︰Steven

美術︰梁政敏