逾70歲續領風騷

呢個7月有兩位年過70歲嘅代表人物特別風騷，年輕人也望塵莫及。

第一位男性代表係維珍集團創辦人，70歲的布蘭森，搶咗亞馬遜創辦人貝索斯同SpaceX創辦人馬斯克嘅閘，早過晒佢哋，喺7月11日晚乘坐自家太空探索公司維珍銀河嘅團結號太空船上太空，並順利安全回航，雖然布蘭森之前經歷過失敗，仍不斷嘗試，今日終於夢想成真。喺新聞片內睇到佢興奮到跳來跳去，簡直散發住熱力節拍，火熱動感啦啦啦！

另一位女性代表係婚紗女王Vera Wang王薇薇。佢喺婚紗界非常成功，從美國流傳嘅一句話可見一斑︰「Vera Wang婚紗，令未婚嘅人想要，離婚嘅人懷念，再婚嘅人慶幸能再次擁有。」從明星到名媛，國外到國內，全世界名流結婚時婚紗嘅首選幾乎全部出自Vera Wang。比如姚晨、楊子姍、李玟、陳妍希、應采兒、郭碧婷、劉嘉玲、湯唯、梁靜茹等眾女星，以及Donald Trump個女伊萬卡、克林頓個女切爾西、碧咸嫂出嫁都係選擇着Vera Wang。

佢6月底歡度72歲生日時，公開生日party照片，相中嘅佢不但擁有螞蟻腰，全身上下肌膚都相當緊致，真係好似食咗防腐劑咁，凍齡無瑕，令人艷羨。不過，日前不幸喺Donna Karen嘅個人社交媒體內，出咗Vera Wang無P圖嘅照片，因而令好多網民及媒體熱搜同報道。雖然佢喺無P圖嘅真實皮膚狀態，同P咗圖嘅照片係有差別，但佢嘅真實身材依然火辣，72歲能擁有咁嘅狀態真係非常厲害。

其實喺佢平時嘅社交網絡上，你可以感受到佢依然擁有活力充沛嘅少女心，時時刻刻蹦蹦跳。所以，現今人人都可以去到長命百二歲嘅世代，只要保持年輕心態，70幾歲又如何？

（本欄逢周四刊登）