老公大仔免費客串拍劇 岑麗香拒讓囝囝做童星

馬國明、岑麗香（香香）、吳業坤等昨午現身為劇集《寶寶大過天》宣傳，談到香香丈夫Joshua（強強）攜大仔Jacob客串劇集，香香坦言無意讓囝囝當童星，希望他能保持童真。

岑麗香的丈夫強強，早前抱實大仔Jacob為《寶》劇客串，引起不少劇迷的回響。香香強調當日老公是帶兒子接她放工才順道參與，她說︰「玩下啫！無騷錢㗎！當日佢哋嘅角色係陌生人路過，囝囝拍完都唔知發生咩事，拍嗰陣仲叫我媽咪，我又唔應得佢，我內心都好辛苦。（介意一家三口拍廣告？）唔介意，但囝囝正式拍劇做童星就唔好，想佢保持天真（童真）。」身旁的馬明即自薦當香香的廣告拍檔，香香戲言馬明可拍攝紮肚廣告，馬明聞言即笑說︰「有錢就乜都紮得啦！」

馬明為新劇狂操肌

另外，昨日見馬明的身形甚弗，他透露正忙為新劇《隱形戰隊》開工，由於劇中飾演警方特別行動組，需要應付大量動作戲，所以開拍前也刻意修身操肌。問及女友湯洛雯可滿意他的身形？馬明直言︰「佢叫我唔好太瘦！」記者戲言他可襯回女友的豐滿身形，馬明笑稱︰「佢話怕我太瘦個樣會睇落好憔悴！」馬明又不諱言劇中多在荒山野嶺拍攝外景，在現時的酷熱天氣下絕對是大挑戰。

攝影︰林良明

美術︰梁政敏

採訪︰Steven