《大叔的愛》搞笑賣萌俘虜網民心 黃德斌︰港劇好少咁瘋狂

ViuTV港版《大叔的愛》前晚首播，在劇中飾演可愛大叔KK的黃德斌，急不及待向MIRROR成員呂爵安（Edan）飾演的下屬田一雄高喊：「田田I love you！」他又向Edan送上百朵玫瑰兼展現cute爆小跳步，衝擊其保持多年的型佬形象。昨午德斌回應《晴報》時喜見網民大愛︰「以前未試過呢種演繹方式！」

ViuTV今年初找來無綫舊將黃德斌，夥拍Edan及扮演凌少牧的盧瀚霆（Anson Lo），在《大叔的愛》中大談辦公室三角hehe戀，該劇前晚首播，正面對撼無綫重頭劇《刑偵日記》。新劇改編自18年同名日劇，還原度甚高，首集節奏比一般港劇明快，極速交代阿田與阿牧同居、KK大曬猥瑣笑容冧阿田等，尾段KK在摩天輪下向阿田表白，重現日版的經典搞笑場面，一向形象粗獷的德斌舉手投足皆充滿喜感，其破格演出驚喜度滿分。不少視迷戲言他被無綫耽誤了喜劇天份；又指他與Edan的可愛互動好笑到喊。

豁出去扮可愛

昨日德斌直言首集反應佳，屬全體演員功勞︰「《大叔》令觀眾震撼係整體化學作用，接呢齣劇嘅同時仲有其他工作，以往又少呢種瘋狂喜劇，所以都想試下演KK。（衝破心理關口？）自己諗下點做，要衝破自己過往演戲嘅諗法，因為以前無綫無開呢種咁瘋狂嘅劇，就算有呢啲角色都唔係由我演，亦未試過呢種演繹方式。（日後多拍喜劇？）持開放態度，乜嘢類型角色都會接！」對於拍檔Edan及Anson Lo，德斌笑言︰「大家有眼睇，佢哋好啱演呢類角色，好有效果！（睇日版參考？）有睇，但係無刻意參考，始終日本文化、笑位同我哋唔同，我嘅外形同吉田鋼太郎都有分別！」

談到網民讚節奏明快，德斌指日版全劇僅得七集節奏更快︰「我哋有15集，ViuTV買咗日劇版權，好多場景同劇情都跟足原著，亦加插香港元素，嚟緊辦公室其他同事，同埋劇中我老婆簡慕華都有好多發揮，大家繼續捧場！」會否開續集？他笑言未有消息，但期待原班人馬再合作︰「唔一定拍續集或喜劇，可以發掘下其他劇種！」

撰文︰Steven

美術︰梁政敏