為愛女入行 許碧姬當「執紙皮婆婆」30年

資深甘草演員許碧姬是無綫御用「執紙皮」、「倒垃圾」婆婆，現年90歲的她育有四名子女，在前晚播出的節目《日日媽媽聲》中，她細訴多年來做臨時演員的原因，原來是為了患病的大女兒，故事充滿「洋葱」。

許碧姬91年加入無綫，大女於96年不幸中風至四肢癱瘓，她在節目中解釋︰「佢（女兒）36歲嗰年得到大病，醫生話佢腦中風，但醫院床位緊絀，叫我一定要搵地方讓她療養，但我睇到療養院個門口已經唔鍾意，我同醫生講︰『我等政府嘅』，醫生問我幾歲，我話65歲，我一邊照顧佢，一邊等。」

女兒病足19年

要照顧女兒，拍劇時間又日夜癲倒，但許碧姬都堅持繼續拍，全因「母愛」。她說︰「無論對白多定少我都去做，咁係為咗我個女。我大女不嬲都鍾意睇電視，又好鍾意明星，咁我去做下戲，返嚟就可以有好多明星相畀佢睇，等佢開心下。佢（女兒）離開咗我好多年，但我時不時都掛念佢，雖然好寂寞，但唔緊要，我同佢去旅行影咗好多相，我成日攞出嚟睇，咁樣個心會舒服啲。佢病咗19年，佢辛苦我又辛苦，我都希望佢早啲得到安息。」

撰文︰倪小珊

美術︰梁政敏