誕6.2磅B仔 首次換片Jayden請「飲茶」 沈卓盈︰小寶寶有大喊聲

沈卓盈（Jess）昨午宣布榮升母親，6.2磅B仔Jayden已於早前出世，認真高興。這位新手靚媽獲老公Calvin陪伴入產房剪臍帶，她又稱︰「老公同我見證Jayden出世嘅寶貴一刻，好感動！」

Jess前年二月與Calvin在布吉舉行婚禮，今年元旦日宣布懷孕，昨午她在IG公布Baby Jayden已出世的喜訊，B仔重6.2磅。她發文︰「想不到小小的寶寶卻有大大的喊聲，爸爸剪臍帶好鎮定，媽媽整個過程就好緊張！」Jess自言與寶寶都很好，又指真正的長途戰現在正式開始。Jess好友陳自瑤留言恭喜︰「BB歡迎你，Jayden終於見面啦。」早前誕下第二胎的岑麗香亦送上祝福︰「Baby Jayden，歡迎來到這世界！」

讚B仔睡相似爸爸

Jess受訪時，透露開刀產子過程順利︰「生嘅時候超緊張，聽到BB喊聲，同埋睇到嗰一刻都有喊，老公同我一齊見證BB出世呢個寶貴一刻，好感動！」她指家人覺得Jayden的額頭、嘴仔似爸爸，眼及鼻則似媽媽。她滿足地稱︰「我覺得佢（Jayden）瞓覺個時最似爸爸，眼仔碌碌就似我！」Jess指身邊朋友已送上溫馨提示，BB在頭幾個月特別難湊，自己早有心理準備。她又說︰「第一次幫BB換片嘅時候，囝囝請咗我同老公飲茶（瀨尿），一日請咗兩次，搞到我哋好狼狽，但係又好好笑！」雖然湊B辛苦兼無覺好瞓，但仍享受過程︰「依家只希望BB健健康康，食得又瞓得！」她透露已做好準備經歷人生另一個新課程，相信這位新手靚媽在未來日子有排忙。

撰文︰Steven

美術︰梁政敏