被「有味」艷女包圍 林雪狂呻頂唔順

林雪在周顯揚執導的新片《真‧三國無双》中，飾演性情殘暴、荒淫無度的董卓，被網民一致讚賞神還原在遊戲中的造型。林雪在片中不時被低胸艷女包圍，以為他享盡艷福，誰知他大呻無福消受︰「大家出晒汗，幾靚女都好，啲體味真係搞唔掂！」

林雪拍攝《真‧三國無双》時正值炎夏，他要穿幾層古裝戲服、黐鬚及戴頭飾，大呻拍每場戲都大汗疊細汗。問他何以答應演董卓？他搞笑說︰「我接呢部戲時首先睇咗個造型，咦？呢個咪我囉，我先接咋！」林雪拍攝戰爭打鬥場面時，看上去極威武，但他身穿的黃金戰衣非常重，更拍到損手爛腳，他說︰「你話拍古裝辛唔辛苦？講唔辛苦係呃人。喺新西蘭外景騎嗰啲馬，係本身野外放牧，無咁易馴服，隻馬一轉彎直情想將我成個人拋落地，仲扭親條腰，好在側邊有個馬伕扶住我。不過拍出嚟真係好好睇，辛苦都值得。」

與古天樂爭女人

林雪在戲中與「呂布」古天樂力爭傾國傾城的「貂蟬」古力娜扎，林雪搞笑說︰「我同呂布（古仔）爭女？佢邊有得同我爭呀？全部都係佢嘅。」本以為林雪扮演好色暴君董卓，一定大飽艷福，但他指在廠景拍攝被幾位艷女包圍的戲份時，因為無冷氣而相當難受。他說︰「啲女仔着到『薄切切』，大家出晒汗，人有體味，真係頂佢哋唔順！幾靚女都好，你話我開唔開心呀？我覺得係一種折磨，啲體味搞唔掂，你唔好見我咁肥咁輪盡，我人就唔挑剔，但味覺幾挑剔。」

撰文︰Iris

美術︰梁政敏