羅霖開心新抱幫手教仔

羅霖昨日帶愛犬出席新春團拜，她指新年願望是疫情快過，讓她可以飛美國探望二仔及混血新抱。去年以視像形式參與兒子婚禮的羅霖，至今仍未見過新抱：「不過我哋成日傾電話，新抱好乖，連個仔唔會同我講嘅嘢，佢都會話我知，好似多咗個女咁。」

羅霖大讚新抱令兒子變得更乖：「新抱讀書好叻，又做三份兼職，係佢鞭策下，阿仔先考到好成績畢業。新抱將我個仔教得好好，令佢無咁依賴，又分擔家務，我畀新抱100分，好想見到真人攬到實一實。」但羅霖不心急做嫲嫲：「二仔同新抱仲好細，等多四、五年都未遲。」

採訪︰Pauline

攝影︰林良明