孭飛《失憶24小時》接棒《燕雲台》 郭晉安賤精賀歲︰劇情懸疑搞笑

由郭晉安（安仔）主演的黑色喜劇《失憶24小時》，將於下周一（15日）晚上8時30分接檔《燕雲台》在翡翠台播出。劇中的安仔飾演口賤賤的市井之徒，他昨晚接受《晴報》訪問時，對新作寄望甚殷︰「劇集有懸疑又搞笑，新年係好檔期，輕輕鬆鬆啱觀眾睇！」

由王心慰監製的《失憶24小時》，集合郭晉安、譚俊彥、譚凱琪、王君馨等人演出，故事描述有錢人譚俊彥與「賤精」郭晉安被綁架後發生的奇人奇事，譚俊彥因意外失憶，安仔想辦法助對方尋回記憶，以輕鬆手法展現荒誕的社會現象。新劇緊接播足一個半月的內地古裝劇《燕雲台》，又是安仔繼19年的《白色強人》後，再有劇集出街，不少觀眾期待他由《白》劇不擇手段的奸角，如何搖身一變成為市井兼口賤的大話王。

講對白有快無慢

安仔回應本報時，透露久未拍攝搞笑劇種︰「近年我都係拍啲嚴肅嘅劇，好耐無演呢類輕鬆又有搞笑元素嘅作品，今次我演一個低下階層，去呃一個失憶嘅有錢人（譚俊彥），當中有好多唔同事情發生！」安仔首度演繹這種市井小人物︰「我嘅角色講嘢唔經大腦，講對白要好快，無得慢，所以要同譚俊彥夾得好好，我哋拍對手戲之前，都會排好耐戲！」

新劇獲安排在大年初四播出，安仔認為並非壞事︰「新年播都係好檔期，劇集輕輕鬆鬆，相信可以吸引好多人捧場，期望有高收視。」宣傳片所見，安仔的演繹帶有一點「阿旺」影子，他回應︰「無所謂，觀眾覺得似邊個都好！」提到新劇接檔內地劇《燕雲台》，他說︰「睇完古裝有時裝劇，畀觀眾多元化嘅選擇，遲啲可能播泰國劇都得！」安仔透露後日會現身為《失》劇宣傳，下月初將到深圳為《白色強人II》拍外景。

撰文︰Steven

編輯︰李潔盈

美術︰梁政敏