捐500底糕點行善 黃亞保恨拍第2輯《煮場爭霸》

《煮場爭霸》黃亞保近日人氣急升，成為新一代「師奶殺手」，善心爆棚的保哥昨日與太太Rebecca到東涌的鄰舍輔導會，捐出500底「亞保陳皮金沙奶皇糕」，送予低收入家庭及有需要的青少年、兒童，分享農曆新年的溫暖氣氛。

黃亞保昨日大受義工及受惠家庭歡迎，他們爭相跟保哥合照留念，有主婦更即場向保哥請教廚藝。保哥育有四名子女，他接受《晴報》訪問時說︰「疫情下，我屋企四個小朋友無得返學出街，難免有啲失落。我好慶幸大家鍾意睇我同Ricky（張錦祥）嘅節目，希望藉住自己少少名氣，可以幫社會上有需要嘅人，大家食到糕點又開心，最緊要牛年新年快樂，身體健康。」

自爆以果汁代酒

提到《煮場爭霸》明晚播放大結局，到底他與西餐代表Ricky誰勝誰負？保哥說︰「我只能夠透露兩個之間會有一個贏家，邊個贏大家記得睇！節目反應好好，好開心，監製張志明都話估唔到，特別係我講嘢唔叻，多得佢哋教我點樣擺動作同講對白，連《流行都市》導演都讚我改頭換面。（開拍第二輯？）唔知監製會唔會開，我同Ricky都好期待，因為出第二輯代表大家鍾意睇，希望有機會再鬥過啦！」

另外，保哥曾揚言他遵從爸爸教導，所以滴酒不沾，但在《煮場爭霸》中晚晚同嘉賓一齊暢飲，保哥自爆原來「杯中物」是節目組為他準備的無酒精飲品︰「我真係唔飲酒，飲半杯都會出疹，所以每次都係葡萄汁或者汽水，哈哈，係咪睇唔出呢？」

【晴報睇住賞--送100盒亞保陳皮金沙奶皇糕遊戲詳情】

採訪︰楊安莉

攝影︰羅灝駿

編輯︰李潔盈

美術︰梁政敏