鄭衍峰曾做空中少爺 馮盈盈自認好容易服侍

《衝上雲霄大選》將於本周末晚上舉行，昨日15位參賽者於電視城古裝街進行外景拍攝，馮盈盈、鄭衍峰、林穎彤、戴祖儀及黃美琪等將會扮機艙乘客考驗各參賽者，馮盈盈笑言一上機就會瞓覺，本身是個好nice乘客，又自爆不會厚待好姊妹麥明詩的緋聞男友盛勁為（Keith）。

馮盈盈對參賽者盛勁為的印象比較深刻，因他曾經上《#後生仔傾吓偈》做嘉賓，面對鏡頭有經驗。而鄭衍峰就盛讚Keith夠上進，他說︰「之前試過上嚟我屋企做gym，所以同佢比較熟絡。」問到會否因為麥明詩（Louisa），而給予盛勁為較高分？馮盈盈直言︰「唔會，我好公正嘅，不過Louisa工作比較忙碌，好少提及佢，我都會睇臨場表現，好多參賽者臨場會好吸引。可能參賽者習慣面對人，所以我哋好快打成一片。」

入行前曾經做過空中少爺的鄭衍峰表示︰「其實連埋訓練，我只係做過11個月，之後就收到TVB嘅offer，依家睇番啲同行，我覺得呢個比賽對佢哋嚟講都係一個新嘅體驗。（會否對參賽者特別手緊？）其實無話係咪特別手緊，反而我想了解三位飛機師，因為平時比較難接觸佢哋。」

馮盈盈被問到是否麻煩乘客？她即表示︰「我反而覺得自己好容易服侍，因為通常上到飛機我就會瞓覺，就算長途機我都可以瞓十個鐘，有時瞓醒連飛機餐都冇食。」身旁的鄭衍峰盛讚盈盈這一類乘客最容易服侍，笑指對方是最受歡迎的乘客，盈盈回應︰「所以就算今年我攞唔到最受歡迎電視女角色，我都贏到呢一個最受歡迎乘客！」

麥明詩向盛勁為教路

此外，盛勁為和陸煥恆（Godwin）一同受訪，Keith表示比賽當晚適逢是Boxing Day，就當去參與party。問到Keith的朋友可有給予意見？他卻稱︰「佢哋不停咁笑我，甚至cap圖去恥笑，個個都話要等到26號晚大笑一餐。（有冇請教麥明詩？）佢都有畀意見我，但就無笑我。」

至於任職健身教練的空少Godwin表示健身教練只是興趣，對於喜歡在社交網上載騷肌照，他解釋︰「習慣做運動，如果無做運動就會囉囉攣，希望大家睇到自己陽光活力嘅一面，決賽當晚係咪騷肌就要保留啲神秘感。」

採訪︰Pauline

攝影︰林良明

編輯：陳禮恒

美術：梁政敏