雲妮拉攏復出「開咪」 蘭茜：當年孖軟硬又驚又好玩

商台DJ雲妮日前在社交網po跟舊同事蘭茜（簡詠嫻）及郭靜的合照，引來不少網民召喚蘭茜「復出」。前日，雲妮宣布成功游說蘭茜出山，客串903節目《雲妮鍾情》。蘭茜在節目中分享昔日入行經歷外，透露自己淡出娛圈後重返校園，完成兩個碩士課程，好學不倦。

雲妮前日公布蘭茜出山喜訊：「聽眾們的盛情難卻加上雲妮不斷落力游說，我們終於集氣成功！相隔廿多年，期待已久。蘭茜在903的REUNION！」雲妮以大堆hashtag搞笑透露心情：「#今次真係講到我口水都乾#感謝茜茜為咗我哋再次開咪#佢成日話已經無做呢行無人會記得佢#大家記得話畀佢知有幾掛住佢。」她更成功說服蘭茜開IG帳戶，蘭茜亦上載兩幅字畫跟網民分享。

92年加入商台的蘭茜，主持《蘭茜夫人劇場》受聽眾歡迎；跳槽新城電台後，在《驚天動地獎門人》擔任「獎姐」，又拍過多部笑片，其醜女角色及「刨西瓜」絕技十分經典。蘭茜在節目中說︰「我無做電台、電視之後就去咗讀書，去咗中大讀人類學碩士，跟住去咗港大讀輔導碩士課程，係自己一路嘅心願。」讀人類學期間，蘭茜因熱愛博物館及歷史，在一間古董店工作︰「畀我好多機會接觸一啲古董同舊物，嗰七年喺古董舖做嘢，非常享受同開心。」

披露變靚啲原因

蘭茜回憶當年與軟硬天師主持節目《老人院》，要在周六晚上十時上班：「當時有啲驚，因為軟硬已經係神級，又要夜麻麻返工。我當時仲係學生，每樣嘢都覺得新鮮同好玩。」雲妮昨日接受本報電話訪問時說︰「我哋有個903群組，之前同蘭茜見面，我提議不如畀大家有個開心感覺，出聲之嘛，又唔使見樣。我定啲題目畀佢分享近況，完全無壓力。嚟緊蘭茜會講畫畫，而個個都覺得佢靚咗，佢亦會分享自己嘅健康生活。」

撰文︰倪小珊

編輯︰李潔盈

美術︰Simon