黃建東 愛做市井佬

黃建東近日在劇集《C9特工》中飾演街市的豆腐佬，身形略胖加上超Old School的鬈髮，帶出市井的佬味，他表示︰「我覺得自己開闢咗一個全新貼地路綫，繼果欄佬、今次豆腐佬之後，在另一套劇會飾演豬場老闆。今次角色貼地得來，觀眾都幾受落，所以我都拍得幾開心。」

阿東在美國紐約修讀戲劇，返港後於香港話劇團擔任駐團演員三年，演戲經驗不淺。11年，他參加《香港先生選舉》獲得「演藝潛能大獎」後，一直以為往後發展會一帆風順，他說︰「我從來唔介意由低做起，不過最初參選《香港先生》，話晒畀人知道我讀戲劇，又拎到才藝獎，以為條路會好容易行，監製會識得搵我，後來才知道原來呢一行受到很多不同因素影響。我入行兩年才有機會正式拍第一個劇《食為奴》，做了娛樂新聞台五年先可以跳出來專注拍劇。」

二次創作狂吸Like

多年來，阿東都只是分派到小配角的角色，直至四年前他開始玩二次創作，將日本笑匠PIKO太郎的神曲《PPAP》加入廣東詞，大玩粗口諧音，結果影片大受歡迎，為阿東建立了一條搞笑、惡搞的路綫，之後經常獲廣告商邀請大玩惡搞片。

阿東笑言︰「呢條路令我有很多得着，多咗廣告收入，觀眾亦好受落，我感覺到大家鍾意咗我多少少。最重要係出發點唔係去攻擊人，我扮嘢之餘亦加入好多創作意念，例如陳偉霆嗰廣告，我加了『叮my lunch box』同『飲茶With姑媽』等，呢啲都係引到大家笑。」

搞笑形象令阿東吸納大批粉絲，知名度提升，總是令人期待他會有別出心裁的新短片出爐，不過，他承認有得也有失，因為搞笑作風令不少角色都被「落閘」，黃建東說︰「返唔到轉頭，的確近來少咗搵我演一些正經角色，很多人見到角色好正經，就覺得我做不來，『我套劇係感情戲，你咁騎呢？』呢啲說話咁囉。之前有套電影係屬於正經陰沉的，唔知點解後來無用到我，我由期待變失望。」

喜獲古天樂鼓勵

他曾經積極地尋找工作機會，惟被人取笑太過進取，他慢慢學會耐心等候。阿東感激大前輩古天樂的鼓勵，他說︰「我二次創作《PPAP》條片，到依家我都追唔返當時個點擊數，有時好驚自己唔夠好，驚自己唔再好笑。之前在演藝人協會上認識古天樂，他主動同我講鍾意我啲片，仲話睇下之後有咩合作，我真係開心到癲，亦好感動。」阿東指古天樂叫他不用太擔心，想就去做，不要等，演員總會經歷拍「爛片」的時期，他自己也是過來人。

阿東承認不時會自我質疑，幸好有前輩的鼓勵，令他重拾自信繼續走，他說︰「我同張振朗同期拍劇，依家他已經是男主角，咁自己點算呢？五年後又會點呢？我目標遠大呀，希望有一日可以做到男主角，搞笑可以再盡啲，亦可以挑戰其他類型角色，希望個人可以立體啲。」

髮型︰Jack Hung@ATO Hair Club

服飾︰Novelty Lane；Palladium

撰文︰楊安莉

編輯︰黃寶恩

美術︰梁政敏

攝影︰林良明