湯怡幫10歲愛犬「恤髮」影靚相

湯怡因劇集《反黑路人甲》人氣急升，日前她帶同10歲愛犬「肥膏」到山頂廣場拍宣傳照，沿途吸引不少市民圍觀，更叫她的角色名字「芷珊」為她打氣。湯怡見「肥膏」在露天草地上盡情狂奔，開心得露出「慈母」笑，她說：「『肥膏』雖然已經10歲，但依然baby face，體能上仲算係小朋友，而且由於太耐無出街，平時內向嘅佢都變得超級活潑，好快進入『拍攝狀態』，表現超好，非常抵讚！」

湯怡帶「肥膏」到以寵物髮型屋為主題的毛孩照相館影相，只見「肥膏」乖乖坐在椅子上，任由湯怡為牠扮靚，萌樣十分可愛。湯怡說：「平時唔使拍劇，我盡量將時間留畀兩隻狗狗，成日幫佢哋安排節目，好似去郊外玩，或者去寵物友善商場。」她笑言中秋節與家人晚飯後，會帶「肥膏」及另一隻愛犬「淇淇」到山頂遊玩兼放電。