組織家庭後 郭富城直認放下心債

郭富城昨日在又一城出席電影《麥路人》保良局學生慈善特別場，城城表示今次安排了多位師生和家長欣賞電影。他提到人生中少不免會與家人產生矛盾，或是基層人士遇上逆境，心中孭着過去的包袱，留下心債。問城城的心債是否已放下？他表示︰「自從有咗家庭，我已經無再刻意去諗，以前嘅嘢已經delete晒，一早已經無咗心債㗎啦，過去嘅事已經無晒，因為咁樣會令自己不快樂，如果未有家庭，就可能仲有好多嘢會介懷。」

城城又提到今年是入行30周年，礙於疫情關係，很多紀念活動都無法進行，不過目前正計劃明年在香港舉行演唱會，至於細節方面，仍需視乎疫情才有定案，他表示今次開演唱會主要是答謝多年來支持自己的fans，「我愛你哋，有你哋真好，會繼續勇往直前。」

另外，問到中秋節將會怎樣度過？城城笑言已準備了兔仔燈籠給兩個女兒玩，是不同款式的，問兩個囡囡會否爭玩具？他笑言︰「佢哋都會爭㗎，我會盡量調停，不過我真係唔捨得鬧佢哋，我係惡唔出樣。」

採訪︰Pauline

攝影︰林良明