關智斌忍笑功力輸畀吳卓羲

在網劇《戰毒》扮演好兄弟的關智斌（Kenny）及吳卓羲，早前為許靖韻及楊天宇主持的網上節目《明冤暗枉補習社》任嘉賓。Kenny與吳卓羲在「忍笑Challenge」環節中，無論問對方任何問題，必須用指定答案回答，頭兩個回合二人全程唔笑，難分勝負，相反其餘藝人已笑到失控，許靖韻更笑到喊，要暫停錄影補粧。最終回合以「Bosco（黃宗澤）腳趾罅識發電」為指定答案，吳卓羲質問Kenny「你知唔知道Bosco隻腳生癬？」等問題，終令Kenny失守，結果輸掉比賽。

另外，Kenny昨日在IG分享新相，照片由好友蔡卓妍（阿Sa）操刀，阿Sa留言說︰「係咪一個靚女幫你影？」張繼聰大讚Kenny靚仔得過分︰「點解唔畀條路我哋行下？」