強尼潘杰寧帶路 1萬元精明遊克羅地亞

新冠肺炎疫情仍然全球肆虐，雖然我們暫時未能外遊，但不妨預早計劃旅行攻略，靜待適當時機出發。ViuTV今晚首播的旅遊資訊節目《萬遊攻略》，打正明號教你用一萬蚊去旅行，仲有A餐、B餐同C餐揀，遊歐洲或亞洲都可以，最正係有齊機票、住宿及交通的詳細預算表，教你玩得精明唔易超支。

《萬遊攻略》主持強尼與三位女拍檔潘杰寧（Kelena）、盧慧敏（Amy）及陳俞希（Hailey）帶大家玩盡克羅地亞、土耳其或柬埔寨，來個性價比高的好玩之旅。今個星期一至五晚上10:30，強尼和Kelena率先到訪克羅地亞，兩人首先抵達薩格勒布，並選擇由南面的杜布羅夫尼克玩返上去，Kelena︰「我哋揀搭巴士，就可以慳番一晚住宿費！而且，長途巴士是當地最直接、方便及便宜的交通工具。」

當兩人北上到達克羅地亞第二大城市斯普利特，除了參觀戴克里先皇宮，強尼不忘施展港人旅行本色，追問開辦民宿的香港人有關當地的樓價，十分搞笑。不過，他亦搜集到一些住宿貼士︰「有人會提供家裏的『梳化』給旅遊人士作免費住宿，但安全問題仍要注意。其實想找便宜又有家的感覺的住宿地方，可以找民宿或留意『SOBE』門牌，嘗試與當地人一同生活！」

離開斯普利特，兩人前往18年贏得金球獎的克羅地亞球星魔迪的故鄉札達爾，尋找他的足迹，又到松露莊園同狗狗一齊掘松露，尾站在羅維尼這個擁有地中海浪漫景色的海濱小城，不單睇優美海景，仲坐埋小型飛機俯瞰全個城區，可說是以貼地價錢，享受離地生活。

撰文︰黃寶恩